O Ministerio de Educación e Formación Profesional convocou onte a Mesa de Negociación do Persoal Docente non universitario, á que asistiu UGT, para informar, por unha banda, do desenvolvemento normativo previsto tras a aprobación da Lei de FP e, por outra, sobre as orientacións xerais para a determinación das prazas para incluír nos procesos de estabilización derivados da Lei 20/2021, do 28 de decembro, de medidas urxentes para a redución da temporalidade no ámbito do persoal docente do ensino non universitario.
En primeiro lugar, o Ministerio expuxo as modificacións que se abordarán tras a aprobación da Lei de Ordenación e Integración da Formación Profesional. A normativa básica establecerá o procedemento de integración ao subgrupo A1, onde se detallaron as condicións de titulación que deben reunir os funcionarios de carreira do corpo de PTFP para a integración que serán as seguintes:
- Título de Grao
- Titulación equivalente para o acceso á función pública docente
- Titulacións equivalentes a efectos de docencia
O procedemento que se expón para a integración do Profesorado Técnico de FP no Corpo de Profesores de Ensino Secundario será a presentación da titulación académica de grao universitario, diplomatura ou enxeñería técnica, no prazo de 20 días, tras a publicación da convocatoria autonómica específica para o efecto. Posteriormente, habilitarase un período de cinco anos para que aquel profesorado que non o solicitou no prazo inicial poida integrarse no devandito período. Neste caso, a súa equiparación salarial e a súa integración no corpo de Secundaría terán efectos na data que se produza a solicitude de integración.
O Ministerio concretou que o Profesorado Técnico de FP pertencente ás 10 especialidades que non se integran ao Corpo de Secundaria, e que reúna os requisitos de titulación esixidos para a integración, tamén se integrará a título persoal ao subgrupo A1, coa especialidade do corpo de PTFP á que pertencen. Os complementos retributivos e de cotizacións, para este profesorado que se integre, percibiranse a efectos retroactivos desde o 19 de xaneiro de 2021.
Ademais, será necesaria a modificación do RD de especialidades no que se actualizarán aqueles aspectos necesarios para habilitar que o Profesorado Técnico de FP que permanece no corpo a extinguir poida seguir impartindo o ensino que ata a data impartía, aínda que pertenzan ás especialidades integradas en Secundaria, así como a actualización de títulos e especialidades a impartir.
Así mesmo, modificaranse os anexos V e o anexo VI do RD 276 de ingreso e acceso aos corpos docentes, onde se actualizarán entre outros aspectos o proceso de ingreso ao novo corpo de Profesores Especialistas de Sectores Singulares da FP.
Desde o Sector de Ensino de UGT defendéronse as seguintes propostas e reivindicacións:
1. Integrar ao Profesorado Técnico de FP no Corpo de Profesores de Ensino Secundario, mediante un procedemento áxil e sinxelo que se desenvolva en todas as CCAA de forma simultánea.
2. Que o Profesorado Técnico de FP e o profesorado do novo Corpo de Profesores Especialistas de Sectores Singulares da FP se poidan integrar ao Subgrupo A1 cando adquiran a titulación universitaria esixida. Para isto reclamamos que non haxa unha limitación temporal, senón que se estableza un período indefinido conforme se vaian adquirindo os requisitos de titulación, recoñecendo a importancia da formación ao longo da vida e da carreira profesional docente. Ao mesmo tempo, que se acorde entre o Ministerio de Universidade e o Ministerio de Educación, o recoñecemento de adquisición de titulación por vía de convalidación de experiencia docente e laboral.
3. Equiparación salarial para o Profesorado Técnico de FP que permaneza no corpo a extinguir e para o persoal do novo corpo de Profesores Especialistas de Sectores Singulares.
4. Sobre o profesorado interino manifestouse a nosa preocupación pola situación dos docentes, especialmente aqueles que imparten as especialidades que pasaron a Secundaria. Por iso, desde UGT reivindicouse a necesidade de habilitar procedementos para que estes traballadores/ as poidan permanecer no sistema e poidan presentarse aos procedementos selectivos que lles permitan estabilizar o seu posto, dada a súa valía profesional e os servizos prestados, para o bo funcionamento da ensinanza de FP onde impartiron docencia.
En relación ao documento orientativo sobre criterios para determinar as prazas a incluír nos procesos de estabilización, o Ministerio de Educación e FP expuxo que prazas deben convocarse, e expuxo que serán todas as prazas de natureza estrutural, que non incluirán aquelas prazas que se deben reservar para a incorporación de funcionarios de carreira en situacións administrativas especiais. Ademais, o Ministerio abordou como se deberían determinar o número de prazas por especialidades e corpos, manifestando que o fin último das CCAA debería contemplar a convocatoria do maior número de prazas no proceso de estabilización.
Respecto ao documento entregado, desde UGT manifestamos a nosa preocupación en relación ao cómputo de vacantes que fará cada CCAA. Confiamos en que as Administracións educativas convoquen o maior número de prazas que permita reducir a taxa de estabilidade ao 8%, para o que o Sector de Ensino de UGT expuxo a necesidade de convocar máis de 130.000 prazas docentes ata finais de 2024.
En relación a outros temas, desde UGT expúxose a necesidade de revisar, dentro da negociación do Estatuto Docente da Función Pública, a integración ao subgrupo A1 do Corpo de Mestres de Taller de Artes Plásticas e Deseño e do Corpo de Mestres de acordo á titulación que se esixe, tras a integración das titulacións no Plan de Bolonia.
UGT solicitou un calendario de negociación que permita dar solución a todas as cuestións expostas de forma negociada cos representantes do profesorado.
