O pasado 24 de outubro, co gallo do Día das Nacións Unidas, o Sector de Ensino da UGT-SP lembra que os Obxectivos de Desenvolvemento Sostible (ODS) foron establecidos en 2015 pola Asemblea Xeral das Nacións Unidas como parte da Axenda 2030: un compromiso mundial para erradicar a pobreza, reducir as desigualdades e garantir un futuro sostible.
A cinco anos de acadar ese horizonte, o noso sindicato advirte que España debe redobrar os seus esforzos para cumprir o ODS 4: garantir unha educación inclusiva, equitativa e de calidade e promover oportunidades de aprendizaxe durante toda a vida para todos e todas. UGT-SP lembra que a educación é o principal instrumento para construír sociedades máis pacíficas, inclusivas e democráticas, e subliña que só cun investimento suficiente, un profesorado recoñecido e centros ben dotados, poderá garantirse os valores de solidariedade, cooperación e dereitos humanos que defende a ONU. Ademais, o sindicato sinala que a educación é a base de todos os obxectivos da Axenda 2030, xa que sen un ensino de calidade non se pode falar de desenvolvemento sostible nin de xustiza social. Con todo, a UGT insiste en que a Axenda 2030 entrou en vigor fai dez anos con metas ambiciosas, e os avances no ODS 4 seguen sendo insuficientes. Por iso, urxe que as Administracións educativas activen medidas concretas que aceleren o seu cumprimento antes do 2030. Reivindicamos, entre outras, as seguintes:
• Aumentar o investimento do gasto público en educación, ata alcanzar polo menos o 5 % do PIB, conforme ás recomendacións internacionais.
• Reducir rateo e carga lectiva, mellorando a calidade educativa e a atención ao alumnado.
• Garantir a estabilidade e equiparación salarial do profesorado en todas as comunidades autónomas.
• Recoñecer e dignificar o labor docente, con condicións laborais adecuadas e políticas de benestar profesional.
• Reforzar a cooperación internacional educativa, como ferramenta para avanzar na igualdade de oportunidades e a educación para todos os nenos e nenas do mundo, en liña cos valores da ONU e a Axenda 2030.
En síntese, a UGT subliña que a Axenda 2030 da ONU sitúa á educación de calidade como un obxectivo esencial (ODS 4) e que este compromiso debe traducirse en políticas públicas concretas e con recursos estables. Por tanto, facemos un chamamento urxente ao Goberno e ás Administracións educativas para que sitúen a educación no centro da acción política para avanzar no cumprimento real da Axenda 2030, a través do diálogo social e a planificación conxunta.
