Evolución e análise do Acordo sobre medidas que melloran o funcionamento do sistema educativo (04/04/2025)
As organizacións sindicais CCOO Ensino, ANPE e UGT-SP comparecemos publicamente para denunciar a falta de cumprimento íntegro do Acordo sobre medidas que melloran o funcionamento do sistema educativo, asinado coa Consellería de Educación, Ciencia, Universidades e Formación Profesional da Xunta de Galicia. A situación, logo de case un ano e medio da sinatura, esixe unha resposta clara por parte da Consellería e do Presidente da Xunta, que ao fin e ao cabo, foi a persoa que asinou dito Acordo.
A nosa denuncia principal é que a Lei 5/2024 de medidas fiscais e administrativas non garante a execución do Acordo. Pola contra, estase a utilizar como ferramenta para entorpecer a aplicación de compromisos asinados — e para dilatar no tempo outros aspectos fundamentais, como a redución progresiva de ratios no marco do Acordo de agrupamentos.
A situación actual revela feitos gravísimos que queremos facer chegar a toda a comunidade educativa e á sociedade galega:
- Existe unha interpretación restrictiva e obstrucionista por parte da Dirección Xeral de Ordenación e Innovación Educativa, a Subdirección Xeral de Inspección e Avaliación do Sistema Educativo e das xefaturas territoriais da Inspección. Sexa por acción ou por omisión, o certo é que se están freando de forma sistemática os avances pactados no Acordo.
- Non se nos facilitan datos obxectivos e esenciais, como as cifras reais de matrícula ou as «fotos fixas» por grupo escolar, necesarias para comprobar a aplicación das novas ratios. Alén diso, algúns equipos directivos recibiron ameazas por parte da Administración para que non colaboren coas organizacións sindicais nin faciliten ningún tipo de información.
- O Presidente da Xunta, Alfonso Rueda, é asinante do Acordo. Con todo, véñense ignorando as numerosas solicitudes de reunión presentadas por escrito polas organizacións sindicais asinantes, en diferentes datas e canles. Reclamamos unha entrevista directa co máximo responsable político do enfoque que se lle está dando ao cumprimento deste Acordo.
Ante esta situación, os sindicatos asinantes estamos a esgotar os prazos legais da vía administrativa para dar o paso á vía xudicial con garantías. Este camiño, lento pero sólido, é a nosa aposta por un sindicalismo serio, firme e eficaz, centrado en acadar resultados reais para o conxunto do profesorado galego. Xa temos en marcha o proceso contencioso-administrativo e a nosa aspiración é que se resolva cunha sentenza semellante á da Comunitat Valenciana, que obrigou alí ao goberno autonómico a contratar case 2.000 docentes por incumprimento dun acordo similar. Do mesmo xeito, tamén presentamos unha reclamación administrativa pola aplicación incorrecta do 10 % de incremento nos complementos de sexenios e titoría. Esta reclamación será acumulada no proceso xudicial para reclamar todos os dereitos vulnerados.
Chamamos a toda a Comunidade Educativa a que se implique activamente e denuncie as situacións de incumprimento, como o recente intento da Consellería de volver aplicar ratios de 25 alumnos en Infantil e Primaria, especialmente na área de Vigo, aínda que tamén noutras zonas de Galicia. Este proceder, denunciado publicamente polos centros, e a reclamación das organizacións asinantes, obrigou a Consellería a dar marcha atrás e cumprir no proceso de admisión de alumnado as ratios que recolle o Acordo.
Queremos rematar agradecendo aos sindicatos que non asinaron o Acordo e que o denominaron no seu momento como «Acordo da miseria», que hoxe reclamen vehementemente a súa aplicación. Instámolos, por coherencia, a que se sumen ao mesmo coa súa sinatura e axuden a construír a unidade sindical que demandan noutros contextos e que se aplica con éxito noutras comunidades autónomas.
A diferenza entre quen se limita a protestar e quen traballa con rigor por avances concretos é que só as organizacións que asinamos e defendemos o Acordo estamos acadando constantemente conquistas reais para o profesorado galego.
A nosa folla de ruta está clara: denuncia pública, mobilización, acción institucional e vía xudicial.
Seguiremos a esixir o cumprimento íntegro do Acordo ata as últimas consecuencias. Porque cumprir os acordos non é unha opción: é unha obriga.
