O 24 de abril iniciouse a campaña Mi voz, mi decisión: por un aborto seguro y accesible, desde UGT unímonos con determinación ao apoio da campaña, que deu inicio á recollida de firmas para impulsar unha Iniciativa Cidadá Europea (ICE) destinada a protexer o dereito ao aborto en toda a Unión Europea.
A situación do aborto na UE é alarmante. Estímase que máis de 20 millóns de mulleres en toda a UE carecen de acceso a servizos seguros de interrupción do embarazo. Nalgúns países, como Polonia ou Malta, a interrupción voluntaria do embarazo está prohibida. Noutros, como Austria e Croacia, onde non é gratuíto, o acceso ao aborto depende das condicións económicas de millóns de mulleres. Noutras rexións de Europa, como Italia ou España, a falta de persoal sanitario dificulta o acceso ao aborto. A millóns de mulleres en situacións de especial vulnerabilidade négaselles o dereito ao aborto, mesmo en países onde é legal.
Esta realidade non só pon en perigo a saúde das mulleres, senón que tamén ten graves consecuencias psicolóxicas e económicas. As mulleres ven obrigadas a realizar viaxes, a miúdo de longa distancia, que moitas non poden custear. Ou, na súa falta, deben buscar alternativas que non son seguras.
Ante a proximidade das eleccións europeas, que se celebrarán do 6 ao 9 de xuño, a ameaza dun posible retroceso nos dereitos sexuais e reprodutivos das mulleres fai que a protección do dereito ao aborto sexa unha cuestión urxente.
Animámosvos a firmar e apoiar esta iniciativa destinada a promover o acceso ao aborto seguro e legal en Europa.
