Onte realizouse virtualmente, non sen problemas de conexión, unha Comisión de Persoal Extraordinaria co obxecto de tratar as modificacións nas RPT das consellerías de Infraestruturas e Mobilidade, de Cultura, Educación e Universidade e da Axencia Galega de Infraestruturas (AXI). As bases do concurso de traslados de estatísticos completou a orde do día da referida xuntanza.
UGT posicionouse a favor, xunto co resto de OOSS representadas (CIG, CCOO e CSIF) das RPT(s) da consellería de Infraestruturas e Mobilidade e da Axencia Galega de Infraestruturas.
Son varios os motivos que xustifican o noso voto favorable que van desde a boa disposición por parte das persoas representantes da Consellería na negociación a facilitar canta información lle foi solicitada así como a inclusión de melloras na súa proposta inicial a instancias das alegación presentadas polo noso Sindicato.
Non tivemos o mesmo éxito na negociación, e de feito denunciamos o proceder das persoas responsables de xestionala, na RPT da consellería de Cultura, Educación e Universidade. Desde UGT puxemos de manifesto, o nulo interese por parte da consellería de chegar a ningún tipo de acordo. Unicamente, e por imperativo legal, fomos convocadas ás xuntanzas previas.
Seguiremos, iso si, reivindicando a modificación dos rateos de aplicación ao persoal non docente, en vigor a través dunha Circular do ano 1994. É inasumible, aínda que por responsabilidade co conxunto das persoas traballadoras nos sentamos a negociar esta modificación parcial de RPT, manter uns criterios ditados hai case 30 anos que afectan de xeito singular ao desempeño laboral do colectivo do persoal de cociña e limpeza respectivamente.
O resultado da votación da modificación da RPT CEU foi o seguinte:
En contra: UGT, CIG e CSIF
Abstención: CCOO
O sentido do voto nas bases do concurso de traslados de estatísticos foi abstención, motivado fundamentalmente en que non se recolleron a maioría das alegacións presentadas por UGT, como por exemplo a non esixencia de permanencia no posto para o persoal que ocupe postos provistos en libre designación, ou o regulado ao respecto da distancia dos trinta quilómetros para o persoal que se atope ao dispor do órgano competente, que está obrigado a participar. Recolleuse a nosa proposta de tomar en consideración o regulado na Lei de impulso demográfico aos efectos de sinalar os fillos e fillas ou persoas acollidas menores de idade ou fillos ou fillas maiores de idade incapacitados xudicialmente, no punto 4 da base III, sobre as solicitudes de participación no concurso e documentación que debe acompañala.
