PROPOSTA DE MODIFICACIÓN DE POSTOS OFERTADOS NO CONCURSO DE ADMINISTRACIÓN XERAL F0424:
O venres pasado tivo lugar a Mesa Sectorial na que se tratou o mesmo tema que o formulado hoxe en Comisión de Persoal. Como documentación da Mesa remitiran unha folla de cálculo con 212 postos que se propoñen para a eliminación do concurso de traslados de administración xeral, son na súa maioría postos das oficinas de emprego. Tamén se eliminan os postos reservados para elección de destino de procesos selectivos para persoas que acreditan discapacidade intelectual, en concreto son 2 procesos, 1 do subgrupo C2 (5 prazas) e para persoal subalterno son 28 prazas.
As opcións que barallaron sobre a proposta que lles realizou a Consellería de Emprego, Comercio e Emigración, ao respecto da retirada dos postos foron as seguintes:
- Non retirar ningún posto que a Consellería de Emprego realice a reestruturación das oficinas de emprego unha vez rematado o concurso de traslados.
- Descartan esta opción en tanto que entenden que ten dous inconvenientes, o retraso da reestruturación, e que si os postos se cubrían de forma definitiva no concurso logo habería impedimento para modificalos para facer a reestruturación nas oficinas de emprego.
- Retirar os postos, tramitar a RPT e unha vez publicada en DOG incorporar de novo os postos modificados ao concurso de traslados, abrir un novo prazo de inscrición para que todas aquelas persoas que no momento de publicarse a convocatoria do concurso e reunisen os requisitos e non presentaran a súa inscrición porque os postos non lle resultaron atractivos tivesen a opción agora que hai os postos diferentes a inscribirse no caso de que quixesen pedir algún destes postos.
- Esta opción tamén a descartaron porque non lles permitiría poder abrir o prazo de presentación de acreditación de méritos e de solicitude de postos a este concurso no mes de marzo e dado que a pretensión e a finalización dos concursos de traslados antes de dar elección de destino aos procesos de estabilización, consideran que non é unha opción válida.
- Polo tanto o que propoñen é retirar o postos necesarios para facer a estruturación das oficinas de emprego, tamén se retira algún posto para facer cambios na RPT derivados da nova estrutura orgánica da Xunta de Galicia. Esta retirada non leva consigo a volta dos postos ao buzón antes da elección dos mesmos na tramitación do procedemento do concurso.
- Consideran que esta forma de proceder vai a permitir publicar no DOG do próximo venres 21 de marzo a resolución de apertura de prazo para elixir postos e para acreditar méritos, que segundo as bases da convocatoria será de 15 días hábiles, polo tanto o prazo será dende o 24 de marzo ata o 11 de abril de 2025.
Paralelamente a Consellería de Emprego comprométese a realizar a modificación da RPT para reestruturar as oficinas de emprego.
A Secretaría Xeral Técnica aclara que dentro das prazas a retirar, non están incluídas as correspondentes ao proceso de estabilización nin as do persoal laboral indefinido non fixo, todo elo coa pretensión de que unha vez aprobada a modificación as persoas que se adscriban a esas prazas teñan unhas mellores condicións.
UGT: abstención CIG: en contra CCOO: A favor CSIF: abstención
CONSIDERACIÓN DE UGT:
En primeiro lugar acoller de bo grao que por fin se atenda a reivindicación de UGT sobre a necesaria revisión de niveis nas oficinas de emprego, cuestión solicitada dende fai máis de 20 anos e que na RPT do ano 2018 non fomos capaces de facer entender aos responsables, naquel momento, da Secretaría Xeral Técnica. Agora demóstrase que o tempo nos da a razón, sendo moi necesario esta revisión de niveis e modelo das oficinas de emprego, co fin de dotar aos postos de certo atractivo e se fomente a estabilidade nos mesmos e non sexan postos “de paso”.
Unha vez escoitadas as razóns dadas, entendemos que a opción máis acaída segue a ser a segunda, en tanto que:
- Somos conscientes da presa e da necesidade urxente de axilizar os concursos de traslados, en especial o de Administración xeral, polas derivadas que trae a toma de posesión dos procesos da Lei 20/2021, razón que nin cuestionamos nin á que nos opoñemos.
- É unha evidencia palmaria que a execución dos procesos selectivos e de provisión nesta Administración levan un retraso o suficientemente importante, no que un par de semanas máis non se van a notar. Par de semanas nas que pode estar aprobada e publicada a RPT, co que o concurso pode continuar unha vez rematada a modificación proposta.
- Outra solución pode ser a publicación de todos os postos incluíndo referencia na columna de observacións na que se fixese constar que as 212 prazas estaban suxeitas á modificación derivada da aprobación da modificación.
Dado que o acto de participar en concurso é voluntario, entendemos que as persoas advertidas do feito de que as prazas sufriran modificación por tramitación da modificación da RPT, serán conscientes do que solicitan. En todo caso si a pretensión manifestada pola Consellería é a melloría das condicións das prazas, suponse que con elevación de niveis, o único que puidera suceder é que algunha se amortizase co fin de contribuír co crédito a esa elevación de nivel, forma de proceder habitual desta Administración. Sendo que no caso de amortización dalgunha delas as persoas quedan, como non pode ser doutro xeito en adscrición provisional.
Atendendo a que non existe obriga de negociar este criterio, agradécese que se queira facer partícipes de opinión ás organizacións sindicais, pero en todo caso, e á vista de que non existe vontade de achegar posicións sobre o mesmo, queremos deixar claro que neste caso a proposta da modificación dunha RPT historicamente demandada pola nosa Organización,que suporá sen dúbida unha mellora nas condicións de traballo e da prestación de servizo público nas oficinas de emprego, e a axilización e seguridade xurídica no concurso de traslados (ao non poder asegurar con precisión o tempo de demora no suposto de manter a nosa posición de partida)matizan, e polo tanto, revisan o noso sentido do voto, polo que a UGT finalmente facilita coa ,sua abstención a aprobación da proposta de modificación dos postos.
ROLDA DE INTERVENCIÓNS:
A Dirección comunica que:
- A funcionarización do persoal Auxiliar Coidador que estaba prevista para o martes 20 de maio realizarase o sábado día 24 de maio.
- Carreira profesional: seguen analizando as alegacións presentadas polas organizacións sindicais, cando as teñan revisadas convocarán.
