UGT quere trasladar a sorpresa coa que nos atopamos o pasado sábado 28 en La Voz de Galicia na que en dúas páxinas sobre emprego público da Administración xeral da Xunta de Galicia, anunciábase a elaboración dun Plan estratéxico de Recursos Humanos para reformar o sistema de acceso e veremos cantas outras cousas.
Asunto curioso é por certo que nada cita, o mencionado artigo, ao respecto dos concursos de traslados normalizados de forma aberta e permanente, nin da promoción interna real e efectiva, ambas materias pendentes comprometidas e que causan un grave prexuízo e desmotivación no persoal empregado público.
O outro titular, do citado medio, refería ao respecto da “negociación abierta para evaluar el rendimiento de 20.000 funcionarios”, engadindo que Xunta e sindicatos están pendentes de retomar o diálogo aprazado, no pasado mes de xullo, ata setembro por acordo da Xunta cos sindicatos sobre a proposta realizada pola Administración sobre a carreira profesional.
Na Comisión de Persoal do pasado 27 de setembro de 2025, preguntouse á DXEPAP pola Carreira profesional, a resposta foi que están valorando as alegacións presentadas na primeira quincena de setembro para convocar reunión. Non se deu data de reunión.
A realidade é que entramos no mes de outubro e afirmamos que UGT, non acordou nin solicitou todo o mes de setembro para facer alegacións a carreira ordinaria. A realidade é que UGT está é moi preocupada polo retraso da negociación de carreira extraordinaria dos graos III, II e I, segundo corresponda.
A realidade é que ata o mes de xullo, non parecía que tivésemos que preocuparnos pola retroactividade a 1 de xaneiro de 2025, pero entrando xa no mes de outubro e coa negociación por facer, xa estamos preocupados, non queremos pensar que a demora poida levarnos o ano 2026 xa que quedaríamos sen ningún incremento salarial en 2025, e a maiores as contías recortadas pola perda que suporá a declaración tributaria complementaria.
Pero, todos tranquilos porque segundo se pode concluír do citado artigo periodístico, vanse resolver os grandes retos do emprego público galego, a modernización dos procesos selectivos, a profesionalización e a avaliación do desempeño, en cuestión de breves negociacións, tranquilidade e que non cunda o pánico.
Ante todo isto, trasladamos que o reto para UGT é que se cumpra o acordado e se abone a carreira extraordinaria en 2025 no grao que corresponda e se axilice dunha vez por todas a xestión dos concursos e dos procesos selectivos con tomas de posesión coordinadas. E así, dar paso a normalización dos concursos, que deixen de ser excepcionais e a normalización do acceso para rematar coa temporalidade, dous grandes males desta administración. Logo, si queren facemos diálogo co Plan estratéxico.
