Para UGT, a convocatoria da Comisión Negociadora esperábase polos asuntos económicos que se trataron. Ambos de obrigado cumprimento. Coa publicación o 5 de outubro no BOE da resolución da Secretaría de Estado de Función Pública aprobouse o incremento do 0,50% nas retribucións do persoal ao servizo do sector público por cumprirse a primeira variable referida ao IPCA recollida na LPGE que condicionaba o abono no mes de outubro. Correos, na reunión de hoxe indícanos que se cobrará este mes o día 30 e 31.
Aproveitar a convocatoria para que se aplique a subida de combustible, tamén era esperado debido a que UGT leva reclamando a actualización dos importes desde xullo.
A SUBIDA DO 0,50% APLICADA A TODOS OS CONCEPTOS RETRIBUTIVOS E CON CARÁCTER RETROACTIVO DESDE O 1 DE XANEIRO DE 2023 para todos os traballadores e traballadoras de Correos recollida no Acordo asinado na Comisión negociadora do 11 de maio vén dada grazas ao Acordo Marco para unha Administración do século XXI, alcanzado por UGT e CCOO co Goberno o 19 de outubro de 2022 que recolle subidas retributivas garantidas ata o ano 2024 e máis dereitos. Grazas a el, todos os traballadores e traballadoras de Correos teñen xa asegurada a subida en 2023 do 3% á espera de que se cumpra a segunda variable referida ao PIB e se alcance definitivamente o 3,5% de incremento retributivo este ano. Nos 3 anos que alcanza o Acordo a subida, en cálculos reais será de ata o 9,8% polo efecto consolidador dos incrementos.
O Acordo incide en: MÁIS SALARIO, MÁIS DEREITOS E MÁIS E MELLOR EMPREGO. Liñas básicas e fundamentais na estratexia que debería ter Correos como Empresa Pública e que UGT defende e esixiu na reunión de hoxe, establece así o marco consensuado de liñas de actuación e medidas lexislativas que debe impulsar o Goberno co obxectivo de alcanzar un emprego estable e de calidade nas administracións públicas e sentar as bases consensuadas da transformación e modernización das administracións públicas considerando que é necesario poñer en valor ao persoal empregado público e facer efectivas as medidas que impulsen unha mellora das condicións de traballo na función pública, de forma que os servizos públicos avancen cara a un proceso continuo de mellora da calidade, da eficacia, da proximidade e a transparencia na administración pública, fortalecendo a todo o persoal que presta os seus servizos no sector público.
SUBIDA INDEMNIZACIÓN COMBUSTIBLE: 0,26 euros/km para automóbiles e 0,106 euros/km para motocicletas para todo o persoal rural e os/as traballadores/as que utilicen o seu vehículo particular por razón de servizo. Exentas de tributación no IRPF. Outro logro do Acordo Marco para unha Administración do século XXI asinado por UGT que recolle no punto 9 “A actualización dos importes dos gastos de desprazamento consecuencia da actividade de prestación de servizos” e que se desenvolve na Orde HFP/793/2023, do 12 de xullo publicada o día 17 no BOE estando en vigor ao día seguinte. Correos, no documento que presenta á firma, axústase estritamente á normativa. UGT non renuncia a seguir defendendo os dereitos adquiridos anteriores por achega de vehículo para o persoal de servizo rural. Correos comprométese a dar cumprimento á esixencia de UGT que o pago sexa con carácter retroactivo desde o 18 de xullo de 2023. Espérase a cobranza no mes de novembro.
UGT aludiu na reunión que este Acordo Plurianual asinado co Goberno na Mesa Xeral de Función Pública, vai máis aló dos acordos retributivos, e que Correos está na obrigación de acometer sen demora a negociación, convocando as mesas correspondentes, doutros dereitos como: a xornada laboral de 35 horas ou inferior (ao eliminarse as limitacións que existían ata o de agora), a despenalización nas situacións de incapacidade temporal conseguindo a percepción integra de retribucións en situación de incapacidade temporal, así como negociar unha regulación propia do teletraballo e das xubilacións anticipadas. Tamén lembramos a desigualdade retributiva do persoal funcionario con respecto ao laboral, que polo mesmo traballo cobra un 5% menos. Correos debe buscar fórmulas de equilibrio para reparar esta desigualdade que se mantén e agrava no tempo. Se se buscan, seguro que se atopan.
