A división sexual do traballo, a segregación vertical e horizontal, a dobre presenza, son conceptos importantes a manexar e factores determinantes a ter en conta á hora de garantir unha protección eficaz das traballadoras e traballadores.
O contexto sociolaboral de mulleres e homes caracterízase por ser distinto e eso provoca diferenzas nos riscos laborais. As investigacións sinalan que os homes se accidentan máis que as mulleres, ou que existen determinadas ocupacións nas que son as mulleres as que corren o risco de sufrir danos asociados á actividade profesional.
Os estudos que se realizan en materia de saúde laboral puxeron de manifesto a necesidade de tomar en conta a distinta realidade de mulleres e homes, tanto os factores sociais, antes nomeados, como factores biolóxicos evitando tomar como referencia ao traballador masculino como universal e neutro. É necesario impulsar investigación que facilite evidencias científicas sobre o modo en que afectan as condicións laborais na saúde das mulleres e homes.
Con motivo do Día Mundial da Seguridade e Saúde no Traballo o vindeiro 28 de abril, desde UGT Servizos Públicos, as Secretarías de Saúde Laboral e Medio Ambiente e de Muller e Políticas Sociais, durante o mes de abril realizamos a campaña A NOSA SAÚDE TAMÉN CONTA.
Dentro desta campaña elaboramos Imprescindibles de abril, onde abordamos en profundidade as medidas necesarias para garantir a integración da perspectiva de xénero na saúde laboral.
Por iso na sección «A nosa mirada» realizamos unha análise sobre o estado da situación. No apartado de «As túas palabras contan» profundamos sobre conceptos relacionados coa discriminación por razón de sexo na saúde laboral para expoñer as diferentes formas en que se manifesta. A sección «A realidade en cifras« permítenos compartir algúns datos para dimensionar a gravidade do problema.
Ademais de analizar, Imprescindibles busca facilitar ferramentas de tal maneira que en «Asesoría en igualdade« contestamos a preguntas que adoitan exporse nesta materia. En «Sindicalismo en acción« propóñense 8 medidas a impulsar para garantir avances, en «Ferramentas« compartiuse unha Guía que visibiliza como realizar a integración da perspectiva de xénero na saúde laboral nos centros de traballo.
En UGT Servizos Públicos traballamos cada día para garantir a equidade nos centros de traballo e con Imprescindibles buscamos contribuír a introducir a perspectiva de xénero no ámbito da seguridade e saúde no traballo.
