A Lei Orgánica 2/2006, do 3 de maio, de Educación, modificada pola Lei Orgánica 3/2020, do 29 de decembro, na súa disposición adicional sexta, apartado 1, determina que, entre outras, é base do réxime estatutario do persoal funcionario público docente a provisión de postos mediante concurso de traslados de ámbito estatal.
No apartado 3, desta mesma disposición, establécese a obrigación para as Administracións educativas de convocar periodicamente concursos de traslados de ámbito estatal, a efectos de proceder á provisión das prazas vacantes que determinen nos centros docentes de ensino dependentes daquelas, así como para garantir a posible concorrencia do persoal funcionario do seu ámbito de xestión a prazas doutras Administracións educativas e, no seu caso, se procede, a adxudicación daquelas que resulten do propio concurso. Nestes concursos poderá participar todo o persoal funcionario docente, calquera que sexa a Administración educativa da que dependa ou pola que ingresase, sempre que reúna os requisitos xerais e os específicos que, de acordo con as respectivas relacións de postos de traballo establezan ditas convocatorias.
O Real Decreto 1364/2010, do 29 de outubro, polo que se regula o concurso de traslados de ámbito estatal entre persoal funcionario dos corpos docentes contemplados na Lei Orgánica 2/2006, do 3 de maio, de Educación, establece, no seu artigo 7, que con carácter bienal as Administracións educativas convocarán concursos de traslados de ámbito estatal, a efectos de proceder á provisión das prazas ou postos vacantes que determinen. Celebrados os últimos concursos de ámbito estatal no curso 2020/2021, procede realizar de novo no presente curso a convocatoria dos mesmos conforme á regulación establecida na devandita norma.
A este respecto, o Real Decreto antes citado, no seu artigo 8, determina que no primeiro trimestre do curso escolar en que vaian celebrarse estes concursos, o Ministerio de Educación, previa consulta coas Administracións educativas, establecerá as normas procedementais necesarias para permitir a celebración coordinada dos mesmos, a fin de asegurar a efectiva participación en condicións de igualdade de todo o persoal funcionario docente. Estas normas referiranse aos prazos comúns a que deben axustarse as convocatorias, ao modelo básico de instancia e á data en que terá lugar a toma de posesión dos destinos adxudicados pola resolución das mesmas, e determinarán, igualmente, as especificacións do baremo único de méritos que deban conter.
